Хуримын дараа хосуудын хамгийн их харамсдаг зүйлс

Buzzfeed.com сайт уншигчдынхаа дунд хуримын ёслолынхоо дараа юунд хамгийн их харамсдаг тухай нь санал асуулга явуулж, эдгээр зүйлсийг шалгаруулжээ. 

Хэрэв та болон таны ойр дотны хүмүүс хуримын ёслол хийхээр төлөвлөж байгаа бол эдгээрээс анхааралдаа авахад илүүдэхгүй болов уу. 

1. Хуримын өмнөх орой спиртийн төрлийн уух зүйлээс татгалзах 

Барууны орнуудад "bachelor party", "hen`s party" буюу хуримын өмнөх орой хуримлагч хосууд тус тусдаа найз нөхөдтэйгөө нэгэн үдшийг өнгөрүүлдэг. Манайд магадгүй  "bachelor party" тэмдэглэдэг, эсвэл тэмдэглэхээр төлөвлөж буй хосууд байгаа бол, амьдралынхаа хамгийн гэгээлэг дурсамжтай өдрүүдийн нэгийг мартагдашгүй, аз жаргалтай өнгөрүүлэхийн тулд, тохируулж хэрэглээрэй залуусаа.

2. Чадварлаг гэрэл зурагчнаар өндөр чанартай гэрэл зураг, бичлэг олныг хийлгэх 

Таньдаг хүн, хямд зурагчин, найз нөхдийн гар утсаараа зураг байхад л болчихно гэж бодож байвал та их том алдаа гаргах гэж байна шүү. Хамаг бүхэн бороо мэт арилж, харин гагцхүү гэрэл зураг л шороо мэт үлдэнэ гэдэг шүү дээ. Олон жилийн дараа ч хуримын гэгээн өдрөө дурсан санахад тань танд гагцхүү гэрэл зураг л туслах болно. 

3. Хуримын ёслолын хөгжмийг зөв сонгох 

Хуримын ёслолын үеэр явах хөгжим, мөн хуримын дараах үдэшлэгийн хөгжмийг тоолгүй өнгөрүүлж болохгүй. Таны хурим, зочдын уур амьсгалд хамгийн чухал нөлөөлөх зүйл учир хөгжмийн DJ, энэ үеэр явах хөгжмийн жагсаалтад анхаарал хандуулаарай. 

4. Ажил амралтаа сайтар зохицуулж, сайн амрах 

Хурим гэдэг чамгүй их ажил шаардагддаг ёслолын арга хэмжээ. Гэхдээ бүгдийг амжуулахын төлөө эрүүл мэнд, гоо сайхнаа тоолгүй өнгөрөөж болохгүй шүү. Тун завгүй байсныхаа төлөө хуримынхаа өдөр ядарсан, хоолой нь өвдсөн байдалтай байсан олон бүсгүйчүүд байдаг учир бүх зүйлийг зохицуулж сайтар амраарай. 

5. Зочдын хүрээг аль болох цомхон байлгах 

Маш олон хосууд зочдын тоог цомхон байлгаж, зөвхөн ойр дотны хүндтэй хүмүүсээ л хамарсан хурим зохион байгуулаагүйдээ харамсдаг учир урьсан зочдынхоо жагсаалтыг та дахин нэг хараарай. 

6. Хуримын даашинз, хувцас, нүүр будалт, хурим хийх газар, зохион байгуулалт гэх мэт хамгийн чухал зүйлсээ өөрсдөө сонгох 

Бүгдийг бусдад даалгах хэрэггүй. Дотны хүмүүсийнхээ зөвлөгөөг мэдээж сонсох хэрэгтэй ч энэ бол таны бас таны хайртай хүний өдөр учир хамгийн гол нь өөрсдөдөө таалагдаж, хамтдаа аз жаргалтай байх ёстой учир хамгийн чухал зүйлүүдээ өөрсдийн санаа бодолд нийцүүлж сонгох хэрэгтэй шүү. 

7. Хуримын өдрөө хоёулхнаа хангалттай их цагийг өнгөрүүлэх

Жирийн нэг өдөр биш учир энэ өдөр бие биендээ хэлсэн үг, хамтдаа өнгөрөөх цаг хамгийн мартагдашгүй дурсамж болж үлдэх болно. Хэчнээн шахуу хуваарьтай, олон зочидтой байсан ч хоёулхнаа сууж ярилцах, бие биендээ сэтгэлийн үгээ хэлэх цаг заавал гаргаарай. 

8. Дотны хүмүүстэйгээ цагийг өнгөрүүлэх 

Хэдий таны хайртай хүнтэйгээ амьдралаа холбож буй баярт өдөр ч гэлээ, таны хайртай аав ээж, ах эгч дүү найз нөхөд тань танаас дутахгүй баярлан догдолж суугаа. Тэдгээр дотны хүмүүстэйгээ баяраа хуваалцаж, сэтгэлийн үгээ хэлж хамтдаа байх, бүжиглэх цагийг мөн заавал өөртөө гаргаарай.

9. Хосууд хамтдаа удаан бүжиглэх 

Хамтдаа бүжиглэ, бүжиглэ, бас дахин бүжиглэ. Эвсэлгүй, огт бүжиглэдэггүй байх тэр өдөр хэнд ч хамаагүй, бүх уйтгар гунигийг умартан ирж буй хамтдаа туулах ирээдүйнхээ баяр баяслын төлөө хамтдаа илүү удаан бүжиглээрэй. 

10. Хуримынхаа зардлыг аль болох танаж, бал сардаа зориулах 

Хуримын ёслолын хамгийн чухал нэгэн хэсэг бол бал сар. Хуримынхаа зардлаас аль болох танаж, бал сар буюу хуримын дараа хамтдаа өнгөрөөх цагтаа илүү их мөнгө зарцуулж хамтдаа цагийг мартагдашгүй өнгөрүүлээрэй. 

Эх сурвалж: http://www.hiub.mn/content/read/5859.htm